بحسناك يا منشي هبوب النوايد
يا خالق المخلوق عالم كيانه
عذني من الزلة كلام وعقايد
وأجعل لنا من صايب القول اعانه
نبغي نجاري كاتبين الشرايد
ما دام ملفي قالها في بيانه
الشعر حجة للعرب بالشدايد
يعرف مكانه بالصدور لزمانه
مثل الذهب لو قالوا الناس بايد
ليا حركه راعيه زاد لمعانه
من عصر بن سلمى إلى اليوم جايد
حديث للالباب وأهل الرزانة
الجزل قايم لو تزيد الردايد
في ساحة الميدان تعرف سمانه
وأهل المواهب زايدين العدايد
كل يسمي من بناته جمانه
ولا كل من غاص البحر جاك صايد
السيف تعرف شذرته من سنانه
وراك عن كشف الحقايق تحايد
سق الشوارد من ضميرك إعلانه
عندك بنات الفكر ما هن بلايد
خل القلم بين البهام وبنانه
مالك ومال مكبرين الوسايد
مدام عندك لشوارد خزانه
الخيل تزلج في جويد الحدايد
وأن طبت المضمار تظهر إحسانه
واللي عزف عن نظم جزل النشايد
يبقى حشيم وله وقار ومكانه
ليا صار ماله بالمزاين عوايد
يا جب على مثلك يوسع بطانه
احفظ نياقك زاهيات القلايد
وعن مرتع الشويان بعد الكنانة
"مدارات شعبية"