يوم الوداع اللي طوى واتعب الحال
جات اهةٍ تكوي القلوب المشافيق
هي آهةٍ متحديه صبر رجال
لين إن سمعوها جميع المخاليق
هزّت صمودي يوم صبري ملا الجال
في حرّها نارٍ وفي ثقلها طويق
ابلغ من التعبير لاخِط وإنقال
في لحظةٍ وعيي بها يغيب ويفيق
أحسها جمرٍ على القلب شعّال
بانت ولا تبغى لها زود تبريق
والله ما أسترها عن الناس لو قال
أقشر عباد الله هرج فوق ما أطيق
تسمّع آهة خافقٍ صوتها إدلال
تنبيك عن قدرك بوسط المعاليق
لا تنتظر مني من الهرج مثقال
أبيك تعذرني نشف مني الريق
وضاع الحكي واستعسرت كل الأقوال
أجمّعه مي من الفكر ويريق
ويا صاحبي يا من زهى راسه الشال
هذا شعوري يوم حان التفاريق
أنت أول إنسانٍ له القلب ميّال
وأنت آخر إنسانٍ ولا فيه تنميق
لكن أبا أوصيّك لو الزمن طال
أبيك تذكرني غروب ومشاريق
وأنا أوعدك ما يغيب ذكرك عن البال
يبقى شجر ذكراك خضر ومواريق
"مدارات شعبية"