يا الله يا الواحد اللي كلنا نرتجيه
نسألك عفوك ولا لغيرك طلبنا السؤال
ترحم فقيد القصيم اللي بكينا عليه
رحمتك يا واسع الرحمة عزيز الجلال
في ذمتك صالح السلمان خفف عليه
واجعل كتابه على اليمنى ولا هو شمال
انزله في جنة الفردوس والهم ذويه
الصبر والاحتساب وقوة الاحتمال
واجبر عزاء احبابه اللي في محله تجيه
بكره اليا مروا المجلس وشافوه خال
أكيد كل يبي يصفق براحة يديه
وكل يقول أنت وينك يا كريم الخصال
الله اليا حب عبده حبب الناس فيه
ويرزقه من حيث لا يعلم برزق حلال
وأبو سليمان ندعي له ومنّا إليه
صدق المشاعر وحب كبر شمّ الجبال
ما مات بقلوبنا عايش ولا حدٍ نسيه
ذكراه عطره اليا جبنا لشخصه مجال
يا العين هلي عليه الدمع ثم اذرفيه
يستاهل الدمع لا منه على الخد سال
تبكي بريدة عليه ومن يحبه بكيه
وتبكي الركيه ويبكيه الأهل والعيال
والمجلس اللي رحل عنّه وهو ما رويه
كل الزوايا عطاشا لشوفته والدلال
لا شك ما مات يبقى فيه من يحتميه
أكيد في مجلس الرجال مثله ارجال
"متابعة "