لا خير في كثر البكا والتصاريخ
الموت حق وتالي العمر زايل
لا والله الا راح من ربعنا شيخ
جدي على اسم الجدي نجم الدلايل
مرحوم يا من دوخ الضد تدويخ
شيخ ماجاته شيخته بالتحايل
مذخورةٍ له من شيوخ مجاويخ
مشى على نهج الشيوخ الاوايل
اللي لهم في كل الاوقات تاريخ
أهل الشجاعة والكرم والجمايل
وقت السيوف وقبل عصر الصواريخ
بسيوفهم فوق المهار الاصايل
تاريخهم معروف وقت المناويخ
يوم القبايل ياخذون القبايل
واليوم في ظل الملوك المطانيخ
آل السعود مطوعة كل عايل
الامن شامل مدنها والتخاتيخ
وألهم على شبه الجزيرة فضايل
عساه فالفردوس يجني الشماريخ
ثمار جنات النعيم الظلايل
"مدارات شعبية"