ياشين قل الوصل من بين الأحباب
خصن ليا صار المواصل مكاتيب
حبن بليا شوف ذبحن للألباب
ما تغني العشاق كثر المناديب
(ولا تنفع الوقفه ورا زلفة الباب)
وشلون تطفي باالقلوب اللواهيب
في ديرتن وحده بعيدين واغراب
حتى المكالم بيننا يا الغضي عيب
معذور قلبن يجرع الهم لو ذاب
ومعذور لو شقيت من شانك الجيب
رفعت قدرك يا الغلى فوق الاهداب
الشاهد الله ربنا عالم الغيب
انك غرامي بين تلعات الارقاب
وان الغلى ما فيه شكن ولا ريب
بس افهميني شخص با الحيل منصاب
يسهر لحاله كيف يلحقه تثريب
لا من دعاه الشوق والشوق غلاب
قمة هناته شوف سيد الرعابيب
حسبت يا روحي لكم مية احساب
ابشرك رجال لو قيل يا ذيب
المرجله ما هي بتفتيل الاشناب
ولا كل شخصن يكسب المدح والطيب
المرجله ما هي صفة كل كذاب
اللي حياته كل ابوها عذاريب
المرجله للي ينالون الاعجاب
بافعالهم ويقدرون المواجيب
والحب ما درس على صفحة كتاب
ما له عدو ولا يعرف المعازيب
الحب من عند الولي رب الأرباب
ولا يقبل اللي يخلق الله تكذيب
"مدارات شعبية"