Al-Jazirah

شاعر الأسبوع شاعر الأسبوع

الشاعر الكبير عبدالله عبدالرحمن الويحان - رحمه الله - من أبرز شعراء عصره شاعر نظم كبير وكذلك من أبرز شعراء المحاورة.. علم من أعلام الشعر وأحد مدارسه.. له قصائد تتصف بالحكمة اشتهرت بين رواد الشعر الشعبي في الجزيرة والخليج العربي.. ذاعت شهرته الشعرية باسم (لويحان) ولد هذا الشاعر في عام 1312هـ في بلدة نفي.. كما اشتهر شاعرنا بطرقه لبحور الشعر الصعبة والطويلة التي سميت باسمه (لويحانيات) له الكثير من القصائد الغزلية العذبة التي تغنى بها عمالقة الفن الشعبي.
إليكم مقتطفات من أشعار هذا الشاعر :
من قصيدة قالها في عام 1365هـ يمتدح بها مؤسس هذا الكيان الشامخ جلالة الملك عبدالعزيز - رحمه الله - نختار منها قوله :

ملكنا عزنا هو مزبن اللاجي وعز الجار

طويل العمر مثل الغيث كل طايله خيره

اليا حارت مشاوير العرب ردوا له الأشوار

تذل الصعاب بدبرة الخالق وتيسيره

يغشم القاله العليا ولا ينشد عن المضهار

بحزم وعزم لين الدرب تسمح له مضاهيره

يدير الناس بأفكاره وهو بالفكر ما يندار

بنى له قصر مجد تاصل الجوزاء مقاصيره

ومن قصائد الحكمة لهذه الشاعر نختار من قصيدة قوله :-

اقول فعال الجميل يسود
والطيب ماله بالرجال حدود
ومن شح في جاهه وبذل ماله
عده مع اللي بالحود رقود
الى صار يدركها ولا يفتخر بها
عن البيض جنب للخصال السود
يفخر بجيران تحت غايب الثرى
وهو عن سنعهم معطي صدود
ماكل مالودٍ يجي مثل والده
شتان ما بين الردى والجود
حشى ما اخص ابها من الناس واحد
الشاهد الله والعباد اشهود
اشكر بها اهل الثناء والمروه
اللي لهم فعل الجميل يعود
نطاحة الواجب على اللين والقسا
عسى لهم كل الليال سعود

ومن قصائده الشهيرة هذه الأبيات التي تتصف بالحكمة حيث يقول فيها :

شعري مثل يا فاهمين التماثيل
كل يجي شعره بحسب اقتداره
من عاش ينظر بالسنين المقابيل
يذوق من عقب البرودة حراره
الطيب يخلق في قلوب الرجاجيل
ماهوب في بنك التجارة تجاره
والرزق من عند الولي بالتساهيل
ماهوب بالقوه والا بالشطاره
من عاش في حيله وكذب وتهاويل
ياسرع من عقب الطلوع انحداره
والشور ما ينفع قلوب المهابيل
كالزند وان حرك تطاير شراره
لو تامره بالعدل يعرض عن الميل
بستل على رايه بربح وخساره
والطبع ما ينزال غيره بتبديل
مثل الجدي مرساه ليله نهاره
والحنظله لو هي على شاطي النيل
زادت مرارتها القديمة مراره

أما عن الشيب فقد قال شاعرنا قصيدة نختار منها قوله :

ابديت ما اخفيت واخترت المصيب من الهناديب
ابيات يفهم لها من كان له عقل لبيبي
قالوا لي الناس شبت وقلت ما يزملني الشيب
من عاش مامات لا بده من الدنيا يشيبي
الشيب ما فيه لابن ادم مناقيد وعذاريب
غذاه فضل الشباب وراح مرجاعه صعيبي
تسير الأقدار بالمخلوق تشريق تغريب
برق بزين القمر والي انتهى وقته يغبي
يا طيب العقل ما تكمل بدنياك المطاليب
لو طاب لك حاجتين فثالثتهن ما تطيبي
كل على قدر حاله موجس منها تجاريب
شي يعالج وشي ما يفيد ابه الطبيبي
والرزق مضمون عند الخالق اللي يعلم الغيب
يرزق ضعيف العزوم ويرزق الشهم النجيبي
كثر الحرص مارزق فرخ الغراب والا اشبع الذيب
كم ليلة بايت جيعان باطراف العزيبي

ومن قصائد الحكمة أيضاً هذه الأبيات:

الا يا مال فرقا العين الا يا مال فرقا العين
يا بعد الفرق بين الناس ياخلاق ياكافي
خطاه الزول صوره يحسب الجمعة ضحى الاثنين
يغر الاجنبي زوله وفي ملبوسه الضافي
فإلى منك قرعت زناد عرفه مع هل التثمين
لقيته عملة ما تندرج مع كل صرافي

ومن قصائده الغزلية نختار هذه الأبيات من قصيدة طويلة :

الله.. الله يا حمام يجر لحونه
فوق غصن البان هاضتني القمريه
ذكرتي من سهوم الهوى بعيونه
واشغلت فكري زيادة على ما فيه
يا الله ارحم واحدٍ بايح مكنونه
والسبب من واحد مامعه ماويه
كل ماشفت القمر قلت لونه لونه
ماجداي الا ازعج الونه المخفيه

وكذلك من قصيدة غزلية أخرى نختار قوله :

البارحة ما هملج الطرف بنعاس
مافاض من نجم عيوني تخيله
لا باس يا عيني على السهر لا باس
على وليف فات مالقا مثيله
عنا قطع شوف المواصل له ارماس
ولا في يدي من زين الاوصاف حيله
فيما ما مضى ياخذ جوابي من الراس
واليوم لا عاني وانا ما عني له
العشرة اللي ما توثق على ساس
تطيح لو صارت حصون طويله

ومن قصائده الغزلية الشهيرة التي تغنى بها الكثير من عمالقة الفن الشعبي هذه الأبيات:

يا حمامة غريبة عند باب السلام
شفت رسم الهوى بأطراف حجانها
ذكرتني طواريق الهوى والغرام
حارت الرجل بالمسعى على شانها
رسمها رسم نجد اللي سقاه الغمام
يا عرب كن زهر الورد باوجانها

ومن الطاوريق (اللويحانية) العسيرة نختار هذه الأبيات :

هاضني مرقب عديت في عالي فروعه عصر والشمس حيه
ساقني سايق الاقدار لين الساق عدا براسه من عذابي
هلت العين في راسه عبايرها وهي مابها لطمة شكيه
يوم شفت السراب ابيض كما القصدير من دون مجلي العذابي
آهٍ وعبرةٍ كنيتها ما بديتها في حشا قلبي خفيه
مثل عبرة يتيم ينزرونه نزر والنزر هظام الشبابي
مقدر انساك يا عجاب يانهاب للقلب لو مالك دعيه
لين يرحل جبل ورقان والا يظهر الشيب في ريش الغرابي

رحم الله شاعرنا وأموات المسلمين رحمة واسعة.. وإلى اللقاء مع شاعر آخر.. ولكم تحياتي
زهران عون الله المطيري /بريدة