الرفقة اللي كلها ضحوك وامزوح
وان جا نهار الجد يا هملالي
ما نيب راعيها ولا نيب مفضوح
وادرى مقامي بين عم وخالي
يقولها قلب من الوقت مجروح
وخانه زمانه واتعبته الليالي
والسر غامض والمشاعر لها بوح
والسر ما نبديه في كل حالي
الا على شخص واعده من الروح
ويبقى بوقت العسر واللين غالي
واذا نخيته واصبح الوقت مشحوح
يفزع معي ويقول روحي ومالي
تفداك دام العلم والسر مشروح
وماني من اللي يكنزون الريالي
اللي بعضهم ناشفٍ كنه اللوح
يابري حالي ياقروم الرجالي
وبوصيك ياللي فالمواجيب ممدوح
لا تشتري الا من خيار الجمالي
ولا تاخذ الا بنت عود وطحطوح
يصبح ولدها من قروم العيالي
شوق الهنوف اللي لها الهرج مملوح
شامت وتنظر للبيوت العوالي
وخطابها شيخٍ له القلب مفتوح
واذا تكلم جا لهرجه مجالي
حتى لو اخطا قالوا الناس مسموح
يا شيخنا راعي العلوم الجلالي
ما هو سوات اللي من الطيب مسموح
اللي على ما قيل لا لك ولا لي
"مدارات شعبية"