يالظلام اللي يتسآئل ينتظر للصبح نور
هو بقى لليل باقي والصبر قرب يمل
آه يا صبر الكراسي والوعد مليان زور
والشتا بوجه العرايا ناوي سيفه يسل
ما دريت أن الثواني صمتها بلحظة يثور
كنت اظنك يا انتظاري تلزم الغيمة تهل
كنت أظن وكنت أظن وكان ظني فيك بور
وكان وعدك لي سرابٍ في سرابٍ ما يبل
كل ما حولي تغير إلا أنا بنفس الشعور
ايه أنا للحين أحبك وأنت بوعودك تخل
كنت اشيد في غيابك للأمل فيني جسور
وكنت اظن الجرح مهما طال صبري يندمل
كنت أشوفك في ورودي لونها وأنت العطور
وكنت أشوف أفراح عيدي بك تزيد وتكتمل
لا متى حروف الرسايل تشتكي جور السطور
لا متى والشوق فينا كل ماله يضمحل
تدري أني في مكاني وانت يكسبك الغرور
وتدري أنه بنتظاري ما بقى للشمس ظل
ما بقالي غير صوتي يقتله مليون سور
ما بقالي غير لحظة بعدها موتي يحل
"مدارات شعبية"