الغيث وقف والسبايب خطانا
زود المعاصي والذنوب الكثيره
الجو صافي ما يخيل سمانا
والبر مقحط ما نشوف البذيره
يا كبرها من جور هذا الزمانا
الشر شاع وضاع خير البريره
وشلون كيف إنا نضيع وفانا
ونترك حقوق اللي رزقنا بخيره
خوفوا من اللي فوق عرشه يرانا
حسيبنا الخلاق يوم الذعيره
الله عليم بالخفى والبيانا
والكون في كاف ونون يديره
تقصيرنا واضح بيانا عيانا
من يوم سحب الغيث ما هي مطيره
والحسد شر يالرجال الذهانا
سم خبيث بالنفوس الشريره
يشقا به اللي في حياته مهانا
يقدح بصدره من لهيب السعيره
واللي نهانا سيدي مصطفانا
لكن من يقنع نفوسا غريره
وقطع المواصل والرحم هو بلانا
والجار ما يعطي حقوق القصيره
وكلما يطول الوقت يقرب فنانا
والعبد غافل ما يحسب مصيره
يالله ترحم ضعفنا وتحمانا
من كيد شر أهل النوايا الخطيره
وختامها لله نرفع شكانا
الواحد المعبود ما فيه غيره
"مدارات شعبية"