خيّم سحاب الحزن وسط الحنايا
وانهل وبله فوق الاوجان مدرار
العلم شاع وعم مدن وقرايا
واظلم نهاري يوم ذيعن الاخبار
شين الخبر كدر خواطر برايا
بفقد من بقلوبها حاز مقدار
قالوا خذنه يا سعود المنايا
ليت القدر يا سعود ياخذ بالاشوار
ما كان فارقنا حميد السجايا
شيخا رحل عرفه نشوره بالاقطار
عمر ابو فيصل ميزه بالمزايا
لو ما عبى للطايله ما غدا اخيار
شيخا رقى بالمجد روس العلايا
بالعلم والحكمه وحنكه بالافكار
واسع مدارك لاقضى بالقضايا
به لين به رقه وبه حزم واصرار
اوفى مع اللي نصبه بالنحايا
له بصمة تشهد على عظم الادوار
تاريخ يحكيه السهل والنبايا
اللي عليه من المزارع والاعمار
يبقى ولو دونه تحول الطوايا
في جوفنا حنا وفي جوفنا الدار
ويالله يللي ما لغيرك رجايا
برحماك يا الله ترحم الحاني البار
وتطهره من كل سوء وخطايا
بمرك يبشر في عتاقه من النار
وبجنتك يسكن بعال العلايا
حوله بنات الحور واثمار وانهار
امين يا مجيب الدعاء بالفجايا
يالواحد المعبود يا وال الاقدار
"مدارات شعبية"