البارحه دمعي على الخد عبار
ممسيت دمعي فوق خدي بهلي
ليلي قضيته في هواجيس وفكار
ممسيت أنا ليلي ولا حدٍ فطلي
على الذي تقطعت عنه الأخبار
عشرين ليلة عن وليفي مظلي
أبطيت ما شفت الغضي ظبي الأقفار
هاك الحبيب اللي هروجه تسلي
ولولاي أعرفه وبخصه قلت غدار
لشك أعرفه بالغلا صافيلي
ولا للي على المجمول رجلٍ ومسيار
وترف القدم صعب يجي في محلي
وشكي على اللي يكرم الضيف والجار
رجل هلله ساسهم من هللي
يفرح إليا جاله مع الوقت خطار
ريف الهجافا وبالمسير يهلي
وله ما قف لثار به عج وغبار
يقلط على الكايد ولا هو يذلي
وذخر الرفيق اللي اليا جاه محتار
عنده العسرات الشرابيك حلي
يا بو محمد تبخص العلم وصار
وعندك خبر بالسالفه ومحصلي
أشكي عليك الحال يا نسل الأحرار
عساك تلقالي مع الزين حلي
"مدارات شعبية"