يا فاتنة جيتي على غير ميعاد
جيتي لقلب يحترق به هشيمه
قلب كواه البعد والبعد وقاد
لا شب ناره في ليالي جحيمه
ياما تصافق به من الشوق رعاد
يا ما تحرك مع هواه ونسيمه
كله لجل قلب هويته ولا فاد
ذاك الغلا ذاك الوفاء والحشيمه
قفى وقفت به ظروفه ولا عاد
وابطى خياله غارق في عتيمه
ودامك لفيتي كوني لجرحي ضماد
أنا يتيم الحب وانتي يتيمه
أبي أعيشك حلم وشموع وأعياد
سوالف غنجا ليال مقيمه
خليني أتذوق معك نكهة الزاد
في رحلة فيها الفيافي حميمه
على دروب الشوق شفتك لي امداد
والحب شفته ينهمر منك ديمه
كوني معايه قرب أو كوني ابعاد
يكفي تلوح رايتك في صميمه
يا فاتنه جيتي على غير ميعاد
بس الأمانة صدق جيتي عظيمه
"مدارات شعبية"