يا زياد اخذ النصيحه من القلب الشفيق
اخذها من واحدا جرب الوقت وعرف
اجتهد واطلب من الله فالحبل الوثيق
من عقلها واتكل عند مولاه الخلف
في سبيل العلم خلك كما الحر الطليق
المطالب ما تجي بالأماني والصدف
المراجل دربها صعب والشاطر يويق
ما يصلها من ركن للتكاسل والترف
غوص في بحر المعرفة ولو موجه غميق
كتب وأفكار علماء أو مجلات وصحف
أول المشوار خطوة توصلك الطريق
وآخر المشوار خطوة توصلك الهدف
ما رضى بالهون من كان له مجدا عريق
ولا ينال المجد من كان وضعه مختلف
وعيشة فيها مذله عساها في حريق
من يموت بعز ما يلحق الدنيا أسف
احذر الأحمق يجي لك خوي ولا رفيق
والكذوب احذر تزكيه لو ان حلف
لا يغرك فالصحاري سراب له بريق
يخدع الضميان وليا وصل قربه يجف
لا يغرك من ضحك لك تظن انه صديق
الصديق اللي معك ساعة الشدة وقف
رافق العاقل إذا شفت له سدا عميق
وابتعد عن كل جاهل وفكرا منحرف
ولا تسمع هرج نمه لمثلك ما يليق
من هرج عندك هرج عنك مع ذاك الطرف
والإساءة من الردي والمذمه ما تعيق
اعتبرها لك شهادة فخر عز وشرف
الهبايب ما تهز الجبل ناظر طويق
شامخا في نجد ما له وصيفا ينوصف
وكان جاتك زله من ولد عم وشقيق
اسمح الزله لعله لرشده ينصرف
التزم بالصمت والصبر لو فالصدر ضيق
لا تبيح أسرار قلبك وسرك ينكشف
وان وجدت القوم كلا مشكله فريق
كون سيفا عادلا بينهم فالمنتصف
التسامح والتعامل بمنطوقا رقيق
واحترام الغير ما هو خضوع ولا ضعف
"مدارات شعبية"