الليل الأسود بنور الصبح متجلي
والصبح يضوي عليه الليل ويعوده
اسلي النفس لو مانيب متسلي
والرجل ما هي على العرجات محدوده
والهرج واجد وش نجيب وش نخلي
الفكر شغال والاعصاب مشدوده
كل المشاكل طوال الوقت تنحلي
لكن بين الوجيه وجيه مقروده
كوارث الوقت تنزل يوم وتحلي
تالي زمانٍ دموعه تغسل خدوده
يا كاسب العلم من عمر الزمن قلي
لاجاتني غلطةٍ ما هيب مقصوده
ان جيت ابا اسكت واخلي الزلة تزلي
تروح نفسي بنار الهم ملهوده
وان جيت اوضح ظروفي ماتهين لي
لا الدرب مغلق ولا البيبان مسدوده
هذا زمانٍ يحط الناس ويشلي
حارن الافكار في نقصه وفي زوده
الطيب نجمٍ بسقف الجو متعلي
والناس كلٍ بمقدوره ومجهوده
واللي بمبدأ الوفاء والطيب متحلي
أقول جعل الزمان يثمن جهوده
القاع يابس وحبل الدلو متدلي
والبير يالخير مذكوره ومعهوده
يرعى الجمل في فياض العشب ويفلي
والجو فوقه بروقه تسبق رعوده
كم قلب شخصٍ بنار الحقد متغلي
حتى ولو جسمه ابرد من هوى السوده
رجلٍ شبوره قريبه خله يولي
يصادم الوقت حتى ينكسر عوده
الصعب يسهل وطبع اللغز ينحلي
المشكلة غلطةٍ ما هيب مقصوده
"مدارات شعبية"