خلّك برايك يا فتى مستقلي
لا تستمع لاهل النفوس الثقيله
سود الوجيه مسودين السجلي
اللي بهم عن جادة الحق ميله
الآدمي ما هو بهيمٍ مفلي
اليامعن التفكير ماحدٍ مثيله
وأنت آدمي بأحسن صفات متحلي
شخصٍ يوديك الخطر لا تجي له
مشيك معه لو كان مقدار ملي
إن كان ما تدري دمار وفشيله
خله يروح بعيد جعله يولي
خاب العميل اللي يورط عميله
وحشم أبوك وعمك وربعك اللي
مالك أساسٍ غيرهم تنتمي له
عن كل مطفوقٍ فعوله تعلي
حط المعاصي عن صلاته بديله
اللي رصيده بالعباده مقلي
والمعصيه هي والنذاله حصيله
وعليك باللي مجتمعهم يسلي
في مجلسٍ معمور يومه وليله
مجلس عرب فرشه مراكي وزلي
من طيب سمعة صاحبه ينعني له
الياجاه طلاب السعد ما يملي
أمكمله راعيه يبغا الجميله
فيه الرجال مجملين المحلي
أهل المعارف والحكم والفضيله
فيه الرجال مجملين المحلي
أهل المعارف والحكم والفضيله
أجواد بوجيه النشاما تهلي
عاداتهم ماهي عليهم دخيله
ما فيهم اللي بالسوالف يزلي
عوارفٍ ما ينطقون الهزيله
الحر ياقع بالرفاع متعلي
والبوم ميقاعه بجنب النثيله
وأدري بتكرار السوالف مملي
والهرج عن كثره يكفي قليله
وتمت بذكر اللي من اجله نصلّي
إلهنا اللي كلنا نلتجي له
"مدارات شعبية"