الناس واجد مير ما مثل الاخوان
ما مثل اخوك اللي يحبك ويغليك
ما مثل اخوك اللي صدوق ومعوان
تفديه بالغالي وبالروح يفديك
يشكي لك جروحه وهمه والاحزان
ولا ضاقت الدنيا بهمك يواسيك
لو كان لك ربعٍ وناسٍ وجيران
ما مثل اخوك اللي عن الناس يغنيك
أخوك هو عزك ولو كان ما كان
يبيع كل الناس لأجلك ويشريك
أنا أشهد أنه لك على الصدر نيشان
تاجٍ على راسك وستر يغطيك
وانا اشهد انه ما يثاقل بميزان
مثل الذهب والماس مافيه تشكيك
وانا اشهد إنه ما يقدر بالاثمان
عن العدو حصن ودرع يوقيك
إياك لا تفتح طريق لشيطان
بينك وبينه جعل ربي ينجيك
ولا تستمع لاجاك علان وفلان
يا كثر ما تسمع من اللي يعاديك
ولا تجعل لغيرك على العقل سلطان
ترى كثير اللي بشوره يدهويك
ترى الدهر دوار يا سرع الأزمان
يومٍ تواريه الثرى أو يواريك
تقول يا ليت الذي كان ماكان
يا ليتني بالقبر جنبك واخاويك
يا ليتك تعود واضمك بالاحضان
أضمك لصدري واقبل أياديك
يا ليتك تعود ترى القلب ندمان
وده يسوق المعذرة ثم يراضيك
مير البلا يا ليت ماردت إنسان
ويا ليت ما تمحي ظلام بما ضيك
تماكن الدنيا وواصل بالاحسان
قبل الندم يطويك والهم يبريك
ونهاية المشوار ما غير الاكفان
ويبقى مع السارين ذكرك وطاريك
"مدارات شعبية"