صحيح الجاهل يزيدك جهاله
ويدبل كبدك بهرجه وحاله
ينزّل مستوى فكرك لفكره
بضعف ادراكه وقل اشتماله
يعاند في الغوى ويشد حيله
وتلحقك المهونه من جداله
يجيب العور كنّه محتسيها
ولا يلقي لها في الهرج باله
ليا منّه ورد عدّ السوالف
يعكّر ماه ويقطّع حباله
يجي من دون هقوات النشاما
ولو يعجبك صبره واحتماله
ضعيفٍ متّر دروب الضعافه
على قل الوفوق وشين فاله
مع أهل الطيب ما سارت ركابه
ولا استثمر بسوق العرف ماله
الا عزّي لمن هذا خوية
وعزّي لابن عمّه وابن خاله
لو أنه ورثة رجال المكارم
هل المعروف ودروب الشكاله
أقول انه عن أجداده موّلي
سبال العود تكرم عن سباله
"مدارات شعبية"