يعني مسافر!.. مالها حل ثاني
نويت تتركني مع الهم وتروح
كتبتني.. والكل لجلك قراني
حرام تترك دفتر الحزن مفتوح
ما قلت لي تبيع عمرك مشاني
ما قلتلي لو راحو الناس ماروح
وين الوعود الماضيه يا اناني
هذا جزاي هموم دموع وجروح
شفني براني الهم شفني براني
واصبحت هدم بطارف الدار ملقوح
يعني خلاص.. اقول راح ونساني
واعود القلب المعنا على النوح
والحب.؟. وسنين الأمل؟.. والأماني
واسمي واسمك.؟. والقصايد على اللوح
ابعدتني مية عمر عن زماني
ورميتني في مفرق الحزن مذبوح
ابها لبساطة.. حط نفسك مكاني
تبيني اقول مسامح. وروح مسموح
(ماني) مثل ما يصرخ الطفل (ماني)
ان رحت يعني تاخذ القلب والروح
وان كان مابه للسفر حل ثاني
ارحل بصمت.. واترك (الورق) للنوح
"مدارات شعبية"