لا تعتذر مالك بقلبي مكانه
حل الفراق ولا بقالك معاذير
قلبي سمح ياللي تخون الامانه
ولا عاد لك قيمه ومنزل وتقدير
صدمتني ساعة كشفت الخيانه
وقدام عيني صرت في موقف صغير
ما دام عيني هي دليل الادانه
ما ظن لك عذر يسامح وتكفير
وشلون خنت اللي حواك بحنانه
وأهداك عمره والسهر والتعابير
أعطاك حبه والوفا والميانه
من غير منه ما عطالك وتقصير
روحي بلا تجريح مني وانهانه
ولا بد ما تلقين جرحك مع الغير
يشوم عن طاريك حتى لسانه
ويشوم عنك الفكر قبل التفاكير
حبك خطا عمره وغلطة زمانه
ما راح يغفرها مع الوقت تبرير
منتي بكفو اللي وهبالك كيانه
يا فاقده للحس والصدق والخير
لكن غدرك ما كسر عنفوانه
ثابت ثبات الضلع بين الاعاصير
كل على أصله وطبعه رهانه
وأنا عزيز القدر بين المناعير
لابد ما لقى فالغنادير دانه
تملا عيوني عن جميع الغنادير
"مدارات شعبية"