صغير في عمري كبير بالافكار
شايب عقل والعمر توته اصغير
راعي سلوم ومتبع درب الاخيار
وأسير مع مقدم هل العرف والخير
لو قللوا قدري عدوين وأشرار
ماضرني هرج الخمم دون تبرير
خلتني الدنيا على الوقت صبار
ووقفت ثابت في وجيه المعاصير
أرسي ليا من الردي لف وأندار
لو صرت بلحالي قطعت المشاوير
وعزمي على كثر الصواديف منهار
بينت كيف تكون وتعيش وتصير
ويا سامعين القول يا قروم يا صغار
بخصكم بالقول من دون تشفير
أنتم رجال الغد والوقت دوار
وبكره على أيديكم تجينا التباشير
عندي لكم نصيحة ما لها اعيار
تازن طويق وضلع جبه مع النير
الاوله خف بطشة النافع الضار
أحرص على دينك وحذراك تقصير
والثانيه خلك لشيبانك البار
أمك وأبوك أعملهم خير تقدير
والثالثة أطلب من العلم مقدار
ما ينفعك فالوقت ويسير السير
والرابعه خوة هل الطيب والكار
حذراك عن نذل يدهويك بالبير
والخامسه خلك كريم على الجار
جارك توصى فيه يابن المناعير
والسادسه ضيفك ليا جاك زوار
أكرم جنابه دون بذخ وتبذير
تم الكلام وسامحوني إذا صار
نقص يعيب هرجتي قبل ماسير
"مدارات شعبية"