يلومني بعض البشر ما درى الحال
يعلها شيء مع الوقت جاها
أبيات شعرٍ قلتها بصوت موال
ثقالٍ من الهم صمتي قواها
أصرخ بعالي الصوت من جال ليجال
أشكي همومي ما كفاني عزاها
بيني وبين الصمت شيء انتهى وزال
بانت علوم الحب واللي وراها
هبات ريحٍ تاخذ العقل بارجال
وآمال ماحدٍ بالمآسي رجاها
الصورة الي تشهد بكل الأحوال
اليوم جنت وانتهت من عناها
باقي لها ذكرى ثمينة وتمثال
مكشوفةٍ للي يحقق وراها
فيما مضى عانت وسمت بي الحال
واليوم كن الشوف عني حداها
باخذ لها عبرة ومن قال لا قال
آمالنا شنت علينا غثاها
يا عاذلين القلب منقوص ما طال
ولا طاب عندي من سنيني مداها
بأنسى جميع الناس حساد وأنذال
وللطيبين بكل كلمة نقاها
أبعد عن الشر وأتركه كيف ما حال
وآخذ من زموم المحبة صفاها
ما أطلب من اللي معدنه صار بريال
أطلب من اللي عزته في لقاها
روضة رسمناها ولها ألوان وأشكال
ما هي بخيلة عن فقيرٍ نصاها
تعطيه ومن حلم الليالي بلا هبال
أحلى من اللي علمتني جفاها
عامورةٍ ما حطها سراج دلال
حنت على قلبي وقلبي لفاها
"مدارات شعبية"