ياليت شوفي لك من العيد للعيد
واقول ياريم المهاء عاد عيدك
يصير يوم العيد بالذات تحديد
أشوف زولك واتسمع قصيدك
وش قلت عن حب القلوب المواديد
مؤجز خبر ماهو لزوم تعديدك
قال المشاعر صادرات ومواريد
وعنها لساني بالصراحة يفيدك
غلاك ما ينقص بقلبي ولا يزيد
معك قريب ومع بعيدك بعيدك
قلت المحبة له بقلبي مواريد
في ضامري ما يوجد الا رصيدك
ريفي وبراق المزون الرواعيد
عيني تراعي لك وقلبي يريدك
اشتاق لك واتبع عليك التناهيد
واحب فيك الحب واحب كيدك
قلبي خضع لك دون شرطٍ ولا قيد
مدري وش اللي صار لي صرت بيدك
ويا كثر ما أناديك باسمك تراديد
أقول شوفي بالمودة وديدك
وغصب الظروف القاسية والتشاديد
تخون وعدي لك وتخلف وعيدك
لكن بزخات المطر تخضر البيد
ويذوب جليد الظروف وجليدك
واقول يا أحلى سكري ثمرة الغيد
من دون شرك أنا بحبك شهيدك
والحب عذب بالشيوخ الصناديد
فتنوا بغالي مثل خدك وجيدك
ليلى وقيس وكم عاشوا بتهديد
وعنتر وعبلة فوق خوف تهديدك
"مدارات شعبية"