يا زين المشي في الروض الخضر لا شعشع المخضار
يا زين الديره اللي من حقوق الوسم ممطوره
يريح البال سجّ في الفياض الخضر والمسيار
سعاده للقلوب اللي مع السلوان مسروره
متى عيني تشوف اللي على قلبي ربيع ودار
اشاهد للسعادة في حياة المجتمع صوره
إلى هلّت مزونٍ فوقهن تنعومتين صغار
على ذيك اللباب اللي من الرضوان مغموره
رياضٍ نبتها يحميه من شمس النهار ستار
تحت فيّة طفافيح الطفل خوخه وبندوره
واشاهد لي بروق دونها ربّانها تندار
تقول اكباس غازٍ من ورا شلال نافوره
سبح ما هر خيالي في الخباري والبرد والنار
واشوف الجمر فوقه دلّه الرسلان منحوره
هذاك المنظر اللي ما تشوفه في الحياة امرار
على شوفه سبابيح الخيال تموت مقهوره
حرام اني ما اهنّي راعي المليون والمليار
ولا اهنّي (عربسات) الفضا دوره ومقدوره
اعيش العالم وطول المدى يبقى لها تذكار
عليّه بالحرام انها حياةٍ ما لها جوره
هذا وجه الصحيح ولا على وجه الصحيح غبار
حقيقه ويتمعّنها اللبيب بكامل شعوره
"مدارات شعبية"