يا مدعين الدين وأنتم خبيثين
من خان دار الدين ياوين دينه
الدين ماهو سفك دم البريئين
أنتم برا من الدين يامدعينه
أنتم ترى عن سكة الدين غادين
وبقلوبكم شراً وحقد وضغينه
أنتم خفافيش غشتها شياطين
وعقولكم لبليس صارت رهينه
وش عذركم يامكفرين المصلين
أقبح عذر وأقبح فعل فاعلينه
لأفكاركم صرتم شيوخاً ومفتين
على هواكم دينكم واضعينه
أنتم تسمعتوا لهرج الحسودين
وحنا قهرناكم وذقتوا الغبينه
جند الوطن دون الوطن مستعدين
الروح من دون الوطن مرخصينه
أمواتنا ماتوا على العهد وافين
وأمواتكم ماتوا وهم خاينينه
وأمواتنا من فضل ربي شهيدين
صانوا العهد صانوه يا ناقضينه
وحنا وراهم نكمل السير ماشين
الصف واحد والعلم رافعينه
من دونها ما نحسب الزين والشين
والموت لا شفناه متسابقينه
حب الوطن يمشي بدم الشرايين
بعروقنا حب الوطن شاربينه
عطت وحنا اليوم معطين معطين
رد السلف بآخر رمق ذاخرينه
العهد ماخناه بالعسر واللين
حنا حفظنا العهد يامضيعينه
عندي على هرجي ثبوت وبراهين
أبطالنا بدميّهم كاتبينه
من عهد أبوتركي إلى حد هالحين
عهد أبومتعب والعهد وارثينه
عبدالعزيز اللي حكمها على الدين
واللي يريد الخير ربه يعينه
جاها ولم الشمل بين المحبين
من عقب ما كانت يتيمه حزينه
وضحكت وراح الحزن والذل والبين
والجهل ويا الخوف ولت سنينه
وطير السعد رفرف بعصر الميامين
حكامنا اللي دينهم ناصرينه
حكامنا دايم على الحق راسين
ودرب السعد لشعوبهم راسمينه
عبدالله وسلطان سقم المعادين
عدوهم ما يدخل النوم عينه
ونايف وزير الأمن للأمن تأمين
حصناً حصين وكلنا ساكنينه
يأمر وحنا للأوامر مطيعين
حلفاً من أول كلنا حالفينه
وحنا جنود الأمن بالموت راضين
أكبر فخر وأكبر شرف كاسبينه
هذا وطنا رمز كل المسلمين
مهبط كلام الله وأرض السكينه
أرض المشاعر والوحي والنبيين
نموت فيها والعهد حافظينه
والحمد لله بالوطن مطمئنين
عشنا الأمن عشناه يا فاقدينه
وعز الوطن دايم وحكم السلاطين
وأهل الخيانة دمّهم هادرينه
"مدارات شعبية"