وين الخيال اللي له بروق ورعود
يقطع ظما الظميان والقلب يحييه
نسمة هوا الغربي أليا ذعذع النود
تدخل على قلبي مغذي يغذيه
واداعب الأفكار بشويش يا سعود
وطير المثايل داعي الفكر يدعيه
دام القلم موجود والفكر موجود
اصخر الأمثال والعلم أثنيه
للي يعرف العلم غاية ومقصود
دايم لبيب القلب بالعقل احاكيه
معنى ومبدا عقد والعقد معقود
اسري مع الهاجس بفكري وسريه
نقدر نقول إن التواضع له حدود
والسبه أن الوقت فيه وملافيه
لقيت من به نقص يبحث عن الزود
تجيه متواضع ويحسبك ترجيه
هذا يقين انه على حد محدود
والناس ما تجهل طبيعي تعاديه
بس المهم البيض ما هي كما السود
ياللي تجيب العلم ليتك توديه
ما نخسر العاقل علشان مقرود
لو جاب علم ما يمشي نمشيه
هذه سياستنا على الهون والكود
أليا بدينا العلم بالعرف ننهيه
ما هو غريب أن الولد يقنع العود
ترى الغريبه فاقد الشيء يعطيه
"مدارات شعبية"