دخيل خذ من والدك لك مساله
مساٍلة ما يفهمه كل رجال
احشم خويك عن دروب الرزاله
تر الخوي عند الاجاويد له حال
المرجلة بالك وترخي حباله
حذرا تعيل ولا تراخى لمن عال
البل يفتل من وبرها عقاله
والخيل تزلج بالشبيلي والاقفال
كان انت ما تدعى على كل قاله
تراك من حسبة هدومٍ له ازوال
وان كان دلوك ما تموحه شماله
تر النشاما يطوحونه على الجال
ورفيقك الداني ليا شفت حاله
احمل عليك من المعاليق ما شال
يا عل رجلٍ شوفته قد حاله
عسى تدور زوجته فيه الابدال
الحمرة تدرك معيشة عياله
ولو كان ما يبغى منه باق الاحوال
وان صار لك من عوص الانضا زماله
حمرا تورد بك ليا صنقر اللال
تمرس كما تمرس خطاة المحاله
مع سهلةٍ عمال من جاء معه ذال
خله مع الديان تمشي لحاله
يا صار منت للمسة الخشم حمال
تر ربع يومٍ مقعدك بالشكاله
يسوى حياةٍ عايشين به انذال
"مدارات شعبية"