هلت العين من دمعٍ تنثر
بالوجع كن عيني مستذيلة
آه وا ونتي ونة مجبّر
ونة اللي تقلب طول ليله
قلبي اللي من الفرقا تجمر
واتزفر من البلوى الوحيلة
قاله اللي على البلوى تصبر
ماله اليوم حيّ يلتجي له
من هوى اللي عن المربى تذير
قايد الريم صيدٍ ينعني له
صابني بالهوى راع المشجر
قلبي اللي سهر من شوفتي له
ناقش الجيب والطوق المقمر
ليت من هو تلوى في شليله
واشقرٍ واردٍ مثل المعذّر
او (قنا) المهدبة وقت تعديله
اودعن حاير ما اقوى ولا اقدر
كلما باعتمد يرمين كيلة
غصن موزٍ عليه الما يفجر
طاغي بالثمر عجزن يشيله
اول الغرس باثماره تبكر
طلعهن ينعش الروح العليلة
دونه السور والمرقى تعسر
غلق الباب والعقدة طويلة
كلما جيت اهوم الباب قدر
من خبر صاحبٍ يرمي خليله
"مدارات شعبية"