لو زمانك يا حبيبي حد قلبك للصعايب
لا تفكر في صعيب ولا تميل بكل ميله
المصيبة والبلاوي وأكبر هموم المصايب
لا ذكرت الله تشيله.. حملك الكايد تشيله
وحزنك اللي في وريد القلب ذايب
لا تحاتي.. نعمة النسيان من ربي تزيله
والشوايب صف قلبك بالصلاة من الشوايب
والعبادة راس مالك والعمل يبقى دليله
كل شي في حياتك ربي خلى له سبايب
والقدر ما أحد يرده لا توجه لك سبيله
خلك بدنيا القناعة لا تطير مع الهبايب
في حياتك لا تكابر تطعن النفس العليله
ومن يذم الناس خله دام يسرد كل عايب
بكره لغيرك يذمك بعد ما يفتح شليله
والقرايب لا تجافي.. احذر بقطع القرايب
ودي أعرف القريب لا جفوا من تنتخي له
خل وصلك للقريب وللبعيد وللحبايب
لا تغيرك الليالي ويسحبنك للرذيله
من غدر بك لو تعزه لا تجي له بالعتايب
لا تجي له لو تكبّر.. لا حشا ولا تنحني له
عز نفسك لو طلبته ما يردنه طلايب
ما يرد اللي عطيته راعي النفس الذليله
دنيتك دايم تغير وش كثر فيها عجايب
يصنع الإنسان فكره قبل كانت مستحيله
وحنا بأفكار التشتت ما نفكر بالغرايب
وفي معالمنا القديمه نفسنا دايم بخيله
لو زمانك ثار ثوره خذ من الثوره ركايب
وخذ من الثوره مزايا زينة النفس الثقيله
"مدارات شعبية"