يا عين هاتي ما دخرتيه كله
من الدمع هاتي كل ما تذخرينه
مثلك على مثل ابن فايز يهله
واجبك مثل اليوم لا تتركينه
هلي غزير الدمع هذا محله
عبرات شالح يوم يذكر جنينه
والا العواجي يوم شاف المذلة
عقب الشيوخ وعورنه اسنينه
هاتي مثل ما جاب دقة وجله
كوده يخف كل ما تذكرينه
مرحوم يلي ما بعد داس زله
علم وكيد والعرب خابرينه
وايلا جلست بجانبه ما تمله
مأمون بأخلاقه وعقله ودينه
والمشكل الكائد برايه يحله
ولا تسمع ألا كل هرجه ثمينه
لو ينفدى خليت كلش فدا له
لاشك ما في دبرة الله غبينه
دنيا على كل الخلائق مطله
كم فرقت بين الخدين وخدينه
هذا تغوى به وهذا تدله
وهذا توسع له وهذا تهينه
كم من شجاع راح واخلى محله
ولابدنا في ساقته مقتفينه
قبر هوى فيه بن فايز لعله
مزن من الوسمي تهشم غشينه
عساه في الفردوس يسكن بظله
والله يجبر غلمه فاقدينه
والنادي المذكور جاء فيه خله
وانهدركن منه لبنه وطينه
يا أبو محمد ما كتب في اسجله
حتى على اللي ساكن في المدينة
يتم بأمر اللي له الكون كله
وباب دخلته كلنا داخلينه
"زمان الجزيرة"