ذكرت ذكرى سبب همي وغربالي
ياقو قلبي على الهوجاس ياقوه
مريت لي منزلاً ياعز منزالي
في طلعة نايفه شرقي (أثليثوه)
لارقبت فيها تشاهد كل الأزوالي
من شرق (عرنان) لين (رضيمت البوه)
دارا لها ذاكره تطري على بالي
يوم الليالي بذاك الوقت محلوه
الله يسقيه من مزلنٍ له أظلالي
من مدلهمٍ يسيل القاع من نوه
يا زينها كان جاها وبل همالي
وصارت خباري هكالريضان مملوه
تصلح لشخص ما هو وسط المدن سالي
يبي أدياراً بعيده خالي دوه
حتى إذا جاء بله عرق خضر خالي
ونزل أدلاله وشب من السمر ضوه
عنه الهواجيس والأحزان تنزالي
ويزين مع نسمة النسناس له جوه
وأمس ايراقب أنجوماً بالسماء اتلالي
الصبح بين وهو في جلسته توه
ومن الولع جر له عشرين موالي
ويردد (الي تبي يا صاحبي سوه)
"مدارات شعبية"