عش يا وطن بأمان في ظل الأبطال
وابناك في عزة وطنهم يعيشون
عبدالعزيز الفيصلي حي ما زال
بعياله اللي عن وطنهم يذودون
وحدك في وقت المجاعة والأهوال
يوم القبايل بالمغازي يعيثون
حيث الجهل في روسهم جاله اخيال
على بعضهم في وطنهم يغيرون
هيّالهم رب السماء راس رجال
حر جعل عميا البصاير يعرفون
رجال بين سلالة الجد والخال
روس الرجال اللي بنوا مجد وحصون
عدّى ونادى في رفيعات الأطلال
وأعوانه أيضاً مع جنابه ينادون
قال اقبلوا محفوظ العرض والمال
اما رضى والا بقوة تطيعون
من طاع طاع ومن عصى راسه يشال
حتى استقر الأمن بالغصب والهون
قرم عزم ما طاع ناصح وعذال
هام الصعاب برأي صاحي ومجنون
رايه سديد وللصعيبات حمّال
يوم اعتمد على الولي خالق الكون
أمّن حدود المملكة وأسس الجال
وخلا العداه الي بغوها يخافون
صقر طلع بالمرجلة وانجب عيال
على الشريعة بالعدالة يحكمون
سلّمهم الراية بعد ظلها طال
وقاموا على منوال أبوهم يسيرون
ودرّت عليهم نجد بكنوز الأموال
درت وصاروا من عسلها يصفون
سالت ذهب والحافها منه خلخال
ومن جودها جادوا عليها ويعطون
حلّوا بحر والخط شقوا له جبال
وتعانقت مع بعضها راس ومتون
انظر جنوب وشرق يا طيب الفال
وزور الشمال وناظر الغرب وشلون
وشوف الرياض العاصمة كيف تختال
عروس في ثوب الفرح شكل وعيون
وتنوروا بالعلم فتيان الأجيال
وقاموا دعاة الحق بالعلم يدعون
على العدالة حكمهم جاله إقبال
لين الصحاري جالها ظل وغصون
وحب الوطن له بالمعاليق منزال
مهبط وحي قبلة عباد يصلون
وبفضل من نزل تبارك والأنفال
يبا يدوم الأمن وابليس ملعون
"مدارات شعبية"