مرحبا حي البيوت اللي لفني
يوم جني منك يا زبن الجلاوي
ازعلني يوم جني وافرحني
يوم قلت انك عن الزينات ثاوي
ودي انك ما تنومس وتغبني
استرح يا ذيب عن ظين الشواوي
سو مثلي يوم شفت وعفت كني
ما ركضت بدربهن سارح وضاوي
كد كوني يالسريحي واتعبني
وعالجني لين طابن المكاوي
وازعلن غيري وأنا لرضاي جني
يوم أنا في طردهن شره وشقاوي
ويوم كثر الشيب فيه وانكرني
ما قصدت وقلت أنا معهن مهاوي
صفتي فاتت وذلي فاختني
ورحت عنهن تارك كل الدعاوي
والردا يا بو صعب ما هو بمني
السنين الجرد ما ترحم وتاوي
عادت الدنيا بلذتها تمني
يغتنى الفقري ويحتاج الغناوي
يوم هجني عن هواهن ما انكفني
انكفوا قبلي عطيبين الاهاوي
وانت عندي وقم سنك حول سني
وشايف عيبي وعن عيبك عماوي
العصب من طول الأيام متثني
ما شكيته لين طبيت الحراوي
والسنين اللي مضن ما يرجعني
من بغى ترجيعت اللي فات غاوي
اترك المقفي ترى طرده يعني
ما رحيل العام واليوم امتخاوي
وإلى اللقاء مع مراسلات أخرى..
"مدارات شعبية"