غيابك مع مغيب الظي بعيوني وقل النور
كشف ستر الغلا فيني وفجأه بدد أحلامي
كشف لك لهفه أخفيها.. وأنا أكابر بصد وجور
أكابر والعطش يصرخ على الميهاف للظامي
أكابر.. والكبر لله.. أحبك.. بس أنا مغرور
ولا اقدر اعترف بخضوع قلبٍ طاح قدامي
هذاني طحت يا قلبي وبيّن خافي المستور
ولا يمديك بغرورك تداوي جرحك الدامي
على ما قيل بأيامٍ خوالي والليال تدور
محال الحال وان طوّل مع الأيام مادامي
انين الوقت يرعبني.. وأسولف كني المسرور
عشان أنتي تشوفيني بعينك.. أخفي آلامي
وانا احسب للقا صدفه.. على اقسى من لظى التنور
واقيس الجرح بدموعي.. وعيني ترثي أيامي
وبغيابك تذكرتك بقايا ودنا المهجور
رميتني بهجرانك.. وأحسب أني أنا الرامي
أفا.. وشلون تظهر لك خفايا قلبي المغمور
أحسب انك هجرتيني نسيتي حبنا السامي
لمحتك جمبي وفكرك سهى بي يا بعد هالحور
أثاريني فقدتك بس.. من سافرت بالهامي
"مدارات شعبية"