يقول الشاعر اللي وان دعوه لما قفه ما غاب
من ارجالن تسوق أرواحها من دون واجبها
سعوديٍ يعاهد دولته ويحارب الارهاب
يموت ولا يخون أرضٍ تربى في مناكبها
شباب ومن غرابيل الزمن راس المعناء شاب
تلوعه الليالي لين علمته تجاربها
أنا مما جرى في المملكة مستغرب ومنصاب
وأنا من قبل أشوف اللي جرى ربعي مكذبها
على التخريب والإجرام يسعى المفسد الكذاب
عدوٍ يدّعي الإسلام وأرض الله يخربها
يعادي دولة تحكمٍ بشرع الله بدون أسباب
من ديار اليهود يجيك بأسلحته مهربها
عقب ما لوثوا مخه وحطوه آلة بثياب
مبرمجةٍ عداوتهم بمخه يوم جاك بها
يحسب أنه يبي يترك على فعله بدون حساب
ورجال الأمن في وجه العدى تاقف كتايبها
وطنا نبذل الأرواح من دونك ولا ترتاب
شهادة في سبيل الله حظيظٍ من يفوز بها
وطنا كل شبرٍ منك دونه تاقف الأشناب
رجالٍ ساهره لجل الوطن تفتل شواربها
براي أهل الوفا حكامنا ومعربين أنساب
بحكم آل سعود المملكة فأعلى مراتبها
ملوكٍ عزوا الإسلام والله عزهم ثم طاب
لنا العيش بأمن من شرق دولتنا لمغربها
يزين الشعر في آل سعود وتكتب الكتاب
ملوكٍ يحفظ لنا الله حاضرها وغايبها
وهبنا حبهم ولهم ولاءنا والله الوهّاب
وعسى الله شمسهم عن مملكتنا ما يغيبها
ويتوب الله سبحانه عن المذنب لمنه تاب
بدينن تطلبك ياالله تكفى لا تخيبها
"مدارات شعبية"