يا الله يا عالم خفا كل وجدان
يا عالم بالبينه والخفيات
يا الواحد اللي فارض خمس الاركان
يا فارض الحجه وخمس الصلوات
يا رب يا معبود يا عالي الشان
يا من بيدك المنفعه والمضرات
أنت الكريم وخالق الانس والجان
تجبر مصيبة من يعاني معانات
اللي قضى ليله حزين وسهران
من جور مابه لاتهنى ولابات
وترحم فقيد حط في وسط الاكفان
في ليلة الجمعه خذته المنيات
فيصل عسى له جنة الخلد مسكان
ويجعل له عن النار مخرج ومنجات
مرحوم ثم مرحوم يا طير حوران
الله يغفر زلتك والخطيات
ويحسن عزاء شايبك وامك والاخوان
الله يعاوضهم بخير ومسرات
يبكي بعد فرقاك شايب وشبان
مكتوب والمكتوب ماعنه صدات
الموت والحفره مرد للانسان
العمر اله ساعه وللموت سكرات
مادايم الا وجه خلاق الاكوان
الواحد المعبود رب السماوات
وصلاة ربي عد ماهل ودان
على نبين وضح الدين بثبات
"مدارات شعبية"