هب القصيد وسولفت لي فصوله
وهو يعرفني زين لا قلت له قال
ونوخت في قفر المعاني ذلوله
وعن ما يجول بخاطري صغت الامثال
وما دام ليّه مع هل الشعر جوله
أبي أتغنى به على كل موال
يا هاجسي بالبال شيٍ بقوله
قدله ثلاث سنين بالقلب ما زال
مشيت في دنيا أخطاها عجوله
وعرفت فيها رجال ورجال ورجال!!
أحدٍ على طيبه تدلك فعوله
وترفع له البيضا على روس الاقذال
وكم واحدٍ يعجبك شكله وزوله
وتزين عليه إليّا حداك أشهب اللال
تقول عن فعله يكفيك قوله
وليّا بخصته غترةٍ فوقها عقال
وكلٍ على ما قيل يتبع ميوله
ومن خلقت الدنيا بها دق وجلال
وأنا بليت بمن لفاني رسوله
يبي يخاويني وأنا عنه رحال
يبي يجي يمي ولاني بحوله
متفاوتين بالمذاهب والافعال
البوم يخمر من خلق بدّحوله
والحر منزاله على راس ما طال
وأنا صديقي ما وصل به فضوله
إنه يذل النفس في كل الاحوال
ويصير لجل غواية النفس خوله
وخوله ما هي ندٍ لفرسان وأبطال
مكانها بالبيت فيه معزوله
وليّا طلعت حطّت على وجهها شال
"مدارات شعبية"