عزاه لك.. يا صاحب الطير عزاه
طيرك ترك درب تبيه وهويته
طيرك تبع درب الحرار وتلقاه
طيرك عصاك اليوم يومك عصيته
قمت اطلبه وادعيه وأعطي مناداه
وقام يتعلى كل مانا دعيته
قام يتعلى وصوت ياس تقفاه
ويعاند صياحي وأنا ما رجيته
يا صاحبي طيرك تبي مثله اشباه
تلقى مثيله لا جزمت ونويته
طيرك يذكرني بطير فقدناه
ماله شبيه مع البشر ما لقيته
طيري بشر ما شاقني مثل لاماه
من العذارى البيض طيري هويته
أعطيت طيرك قصتي عقب رجواه
وبلغته بقصة هواي ونخيته
يا طير بلغ صاحبي كان تلقاه
يا طير عن فرقاي ياما نهيته
يا طير عقبه مقعد البيض عفناه
والهم بين ضلوع صدري طويته
يا طير هذا منزله ذاك ما طاه
وهذا المراح وذاك يوم التقيته
ماكل منيضحك ويبدي ثناياه
يبدي الموده والخفا مادريته
يا طير هاذي قصتي كان تلقاه
عطه القصيده كان شفته وجيته
"مدارات شعبية"