أحاول أنسى واترك الهم وارتاح
لكن تذكرني مشاكل زماني
أيامنا بين التعاسة والأفراح
ويبقى العمل والعبد لا شك فاني
ما دام باجساد المخاليق الأرواح
تبقى الهموم وكل عايش يعاني
لا تبعث جروح قديمات يا صاح
جديد وقتي عن قديمه كفاني
يحتاج لي مشفى ومشرط وجراح
لا زلت أعاني جرح لا زلت أعاني
يا صاحبي ما يثمر الشري تفاح
وبير الفلس يقطع ظهور السواني
الخاطر اللي لا تكدر ولا ساح
عيّا يوضّح لي رموز المعاني
يعطيني الدنيا مع الفجر يا لاح
وبالليل ياخذني كثر ما عطاني
مر وكتبني بالقلم فوق الألواح
لكن بدون أسباب رد ومحاني
وطالعت لي في عتمة الليل مصباح
مدري جدي مدري سهيل اليماني
لا رحت أنا يمّه برجلي ولا راح
ثابت وأنا مثله ثبتّ بمكاني
لا حشت فود ولا تهنيت بمراح
إلا من أسبابه تزلزل كياني
لو شفتني يا صادق الود مزّاح
آخذ من أطراف الدقايق ثواني
الغبه اللي تلتهم كل سبّاح
عيّت توديني بعيد المواني
صادفت أنا فيها تماسيح وأشباح
يا رب صبّرني على ما دهاني
تدري ضلوعي سدّها ليه ما باح
القلب ثابت والمحاني محاني
للصدر قفل أسرار من غير مفتاح
هذاك في شأنه وأنا أبخص بشاني
الحمل لو شلناه مدّه وينزاح
بأمر الذي ماله بهالكون ثاني
يا المجزرة لا تحسبين الجمل طاح
يطيح يا طاحت حصون المباني
ما دامت أشم الهيل بالبن يا فاح
ما والله أسرج للمهانه حصاني
"مدارات شعبية"