حط عينك بالأماكن شايف شلون الخراب
انت لآمن غبت عني صار في قلبي كذا
الوجود اللي تشوفه ينتهي مثل السراب
الصحاري تبكي الما والزهر يشكي الشذى
المداين موحشتني والشوارع اضطراب
العرب ما هم عربنا والبلد ما هو هذا
الخفوق اللي سقيته ينبت اليوم اكتئاب
والوريد اللي سكنته صار جرحك له غذا
تلوي اذراع الموده خابر نفسك شباب
وأنا بنت شاعريه ما لي ومال الأذى
إن قسيت أعلنت حربي بالدموع وبالغياب
وإن خذاني كبريائي انت أدرى وش خذا
خل قلبينا حبايب واصدقا وإلا صحاب
خلنا زي اصبعينك يا حبيبي هكذا
السما جنحان قلبي والغلا مثل السحاب
يمطر الدنيا مشاعر بالمحبة يُحتذى
برسم أحلامي بشوفك يا حبيبي في كتاب
وكل ما أقول التقيني لا تحط هذا.. إذا
لا تحطم لي خفوقي تتركه كله خراب
ارحم اللي من فراقك قلبها شاف الأذى
"مدارات شعبية"