سلام مني عد مايطلع النور
واعداد ماتمطر من الغيث غيمه
سلام من شاعر محنك ودكتور
دكتور في بدع اللحن والوسيمه
بابور فكري يُطرب أمواج وبحور
ويزفني بين البحور الطميمه
يابن فهد يا محكم الراي والشور
حكيم من روس الرجال الحكيمه
عبدالعزيز بطيّب الفعل مذكور
الكل يدعى له عسى الله يديمه
عد الروى يصلونه ورود وصدور
يروي الكبود الضاميات المحيمه
له مع رجال المعرفة والكرم دور
الأصل طيب والمواقف عظيمه
يامير لك في مهجتي قصر معمور
من دونكم ما شوف للعمر قيمه
واخلاصنا من ماضي الوقت مخبور
مخبور من ماضي العصور القديمه
يامير انا من فعل الانذال مقهور
تحريفهم للقول احسه جريمه
سمعت بين الاجهزة علم منكور
ما يفعله من فيه غيرة وشيمه
محرفين الصدق بالكذب والزور
اهل الحكايا والحقد والنميمه
يقلون شوفوا واسمعوا قول مستور
وهي علي من الظلايم ظليمه
احلف وانا ماني على الحلف مجبور
اني لكم مخلص بنيه سليمه
ياعل من خلفك في جنة الحور
في جنة الفردوس ينعم نعيمه