يا بنت قلبي على طول الصبر ضاري
بس الجسد في وطن والروح في غربه
واشغال شرق الرياض وظرفي الطاري
عذر حوالي سنه وانا تعذربه
اقول مشغول واقفي سارح ساري
وما شغلي الا مكان بس ابي قربه
يجذبني الشوق يمك طوع واجباري
واسر به لك مع الأيام واجهربه
ومهما تظاهرت بامر عكسه الجاري
من يمزج الدمع بالدم يتظاهربه
ما بين جهل تخيرته وانا داري
ومطلوبي اللي معي وازريت لا ظفربه
راح العقل ريشة طارت مع الذاري
او صاحب خير لي من صحبته حربه
لو قالوا اهل النصايح بيع يا شاري
سيل المحبه يخم اللي على دربه
وغرس الوفا نامي ما هوب متواري
دام ان غلاك الهوا والري والتربه
وان سولفوا عن غرام ماله مباري
قولي غرام يشرفنا ونفخربه
يا حاضر اسمع وشاهد واقر يا قاري
ما هوب عيب هوانا يوم نذكربه
والصبح لا صار من ثوب الدجى عاري
أنور به الكون عقب الليل واسفربه
"مدارات شعبية"