نوم الهناء ياللي من اليوم غافي
عساك يالنايم حلام سعيده
يا ليتني مثلك نديمي لحافي
ولا كدَّر الخاطر علومً عديده
أصبر وفي صبري تغيص الظلافي
واقول وينك يا صدوق العقيده
مرَّن كما مر السنين العجافي
يا الله عسى ذيك العواقب حميده
أبحرت في ذيك الفجوج الغيافي
الريح عاتي والمراكب عنيده
ولقيت فالرفقه خوياً سنافي
تقطع به الفرجه ولو هي بعيده
تلقاه قدمك ما يعود خلافي
أرياه لاكثر المراوي سديده
أن قيل وافي قلت بالحيل وافي
تعتز فيه الليَّحه والبديده
يعجبك في وقت القسا والعوافي
نعم الصفات ونعم هاك الوليده
ما يلتفت لأهل العقول الضعافي
وان شاف له علمً جميلاً يزيده
الله لا يثري ثرى كل جافي
اللي على الأقراب ينفخ وريده
"مدارات شعبية"