عشت السنين المقفية في حياتي
على وناسه ليلهن ما صفا لي
عقب العزيزة سيد كل البناتي
فراق الحبيب اللي على القلب غالي
أم الجمال اللي اغطاه العباتي
مثل الذهب زينه يفوق الخيالي
هي فرحتي هي غايتي هي غناتي
هي منوتي هي مكسبي هي حلالي
نفسي تبيها أشوفها بالتفاتي
وروحي تفوح ونارها باشتعالي
حبه سطابي لين بين بذاتي
وبعده جرحني لين قرّب اهبالي
كني غريمٍ منه كاتب وصاتي
حملي ثقيل وهم غربة وجالي
أنا الغريب اللي مقيلي مباتي
فراشي صفاةٍ نومها ما هنالي
بصمّ الجبال العزّل المايلاتي
اللي عليهن ذاريات الرمالي
عراض المتون بعيطهن شاهقاتي
اكبر رتجهن بالحزم والتلالي
برق جنايب رسوهن بايناتي
سرحان فيهن بالطويل الموالي
ضلع طويل وروسه الحايماتي
فيه الهواء ولهن طويل الظلالي
ما طار فيه البوم يذكر بتاتي
ولا شيف به طير الجراذي يقالي
فجاجٍ عجاج أطلاله الموحشاتي
ذار الهواء ينسف عليهن شمالي
الصبح شمسي دونها العاصفاتي
والليل شوفي دوب ضوح الهلالي
خليتني يا زين فيهن صفاتي
حافي قدم مجهول وحدي الحالي
ونزلتني هيج قريب بظماتي
منقع هماجٍ ماه صبخى هيالي
والريع يابس نشّ ميّ القلاتي
اقفى السحاب وفات رش الخيالي
جرعتني شربه ويبست شفاتي
في صيهد وهاج شمسه يلالي
شفت الضياع وعشت وحدي براتي
خليتني للمقفيات الليالي
وريتني يا زين حفرة مماتي
بين النفود وبين ذيك الجبالي
والموت حق وباقية ذكرياتي
على الرجوم المرقبات الطوالي
هاذي نهاية قصتي في حياتي
رحلة غرامك حب قبل الزوالي
"مدارات شعبية"