بديت باسم مكور الشمس تكوير
في يوم ميعاد انكدار النجومي
أرجيه يدمح لي خطا كل تقصير
انا برجوى رحمتك يا رحومي
من بعدها يا زين نظم التعابير
باغلا مناسبة علينا عمومي
يوم الوطن فيه الفرح والتباشير
أي والله افرح فيك يا اعز يومي
توحدت فيك البلاد وبدا الخير
على ايدين الصيرمي العزومي
عبدالعزيز اللي طلع مطلع الطير
طير اسبوقه للمعالي ترومي
لم الشتات وقرر الحكم تقرير
من بعد ما كانت امزاعٍ اقسومي
من بعد ماكنا اسنود ومحادير
صار المواطن والمقيم امحشومي
في نعمة نحسد عليها من الغير
امن ورغد وموثقين الرسومي
تبت يدين المرهبين الخنازير
شلة خفافيش الظلام الرخومي
حنا على الوحدة صفوف وطوابير
متوارثين المرجلة والسلومي
في ظل ابو متعب زبون المناعير
عبدالله اللي جعل عزه يدومي
"مدارات شعبية"