السموحة صعب اعبر عن شعوري وان قويت
سهلة اكتبها أحبك بس كيف أوصف غلاك
السموحة يا وطنا لو ذكرتك ما وفيت
الوفا اللي شفت منك ما لقيته من سواك
يا غلايه ويا غلا فهد العروبه مبتديت
كلما حاولت جهدي تهت باول مبتداك
لو أحاول اختصر حبي ولو في ألف بيت
بظلم احساسي واقصر لا ولا بوفي معاك
دونك الارواح والغالي وربي لك رجيت
يحفظك من حسادينك شامخ مهما وطاك
الحقيقة انت وافي.. وبالوفا هذا ربيت
واعتبر جاحد اذا ما قلت لك عمري فداك
لو اضحي لك بروحي والله اني ما جزيت
يكفي اني عايش بخيرك ومتنفس هواك
والله ما تكفي احبك ووالله ما اعلن رويت
كيف يروى من عشق ارضك وغنى في ثراك
كم تمتعنا بخيرك وأنت راضي ما شكيت
عشت شامخ ما لأحد منه سوى رب حماك
لا يهمك من جحد فضلك بعد ما أنت عطيت
ولا يعكر صفوك اللي اغضب الله ونساك
دام منهجنا كتاب الله ابشر لاعتزيت
(غيمة الارهاب) نمحيها ولا تعلى بسماك
رضاك غاية كل مخلص يرضى لا منك رضيت
والعيون الساهرة ما همها الا رضاك
من نوى لك غدر خاسر واعتبره اليوم ميت
ميت بغبنه وظلمه وين هو من مستواك
ما لهم غير الخزي وانت فيهم ابتليت
وأعرف انك رغم جرح الغدر وافي في عطاك
وانت يا من لمتني ان كان ما تدري دريت
صعب اعبر عن وفا امي وأبويه وش بلاك
وأعرف اني لو أطاوع هالمشاعر ما انتهيت
بأظلم احساسي واقصر لا ولا بوفي معاك
"مدارات شعبية"