ياليل لاهنت ياليل النوى.. ياليل مالك صباح
تسري نجومك ولاتسري.. ولا يطري لك انك تروح
ياليل ياليل شاخ الحزن واستوطن خفوق الجراح
وأنته عسى الله يكافينيك ما يكفيك مافيك ضوح
خيم ظلامك على أيامك علامك مانويت المراح
ياشين مالك مدا.. وجهك بدا.. غامض ولالك وضوح
لا نور شمسك نوى يشرق.. ولا برق الأمل فيك لاح
رمد سكونك على كونك ومجنونك يعد الجروح
ياليل ياليل ضاع العمر ضاع العمر والحظ طاح
ياليل ما عاد للدنيا طعم.. ماعاد للحلم روح
ياليل وش فيك ساكن حرك الساكن ترى العمر راح
انفض رمالك عن آمالك ترى سر الحياة الطموح
ياليل ما قيل فالدنيا هذاك من الهموم استراح
ياليل مير الهموم هموم مجروحٍ يصيح وينوح
ياليل عانه مكانه في غياهيبك يجر الصياح
صابر وعبرات عينه من مدامعها تهل وتفوح
"مدارات شعبية"