يا قبر جبنالك خيار الرجاجيل
رجلٍ صفات المرجلة قد حواها
دوخي فرق ماله حليٍ بهالجيل
مواقفه مافيه رجلٍ مشاها
مرحوم يا نجمٍ هوى تالي الليل
رمز الوفا والطيب فيه إنتباها
لا والله إلا ما بقى نجم يا سهيل
غاب القمر واظلم غيابه سماها
جعله محرم عن سنا النار والويل
في جنة الفردوس يقطف جناها
دوخي مع الأصحاب صافي كما النيل
ولا العدا يركي عليهم لظاها
انا اشهد إنه ما بقا به محاصيل
الدار تبكي غاب عنها ذراها
تبكي على اللي للمراجل مداهيل
مواقفه كلٍ بعينه يراها
تبكي عليه الدار في صوتها حيل
ومن لامها يا جعل روحه فداها
تبكي على دوخي زبون الرجاجيل
لطام باللقوات هامة عداها
سبع الرجال إليها انثنى ينقل الشيل
الله من ليلة ظلام سراها
ونعمين ياللي ما مشى بالتهاويل
يبغى المكارم والمكارم زهاها
وقبله بكت ناسٍ كرام ومشاكيل
بفراقهم يا رب تجبر عزاها
عز الله انه راح منها حلاحيل
في وقتهم ما أحدٍ تهقوى حماها
يسقيك يا دار تفوق التفاصيل
دارٍ زحازيح الرجال بثراها
راحوا وحنا مقتفين ومراحيل
واللي ولاهم كل نفس ولاها
وصلاة ربي عد وبل الهماليل
على الذي مبعوث للناس طه
"مدارات شعبية"