قال الذي يازن جوابه الياقال
ما كل شيء لا طراله يقوله
ما كل ما يطري على البال ينقال
ولا كل ما تعانيه تاجد حلوله
فكرت بالدنيا وتغيير الأحوال
وتغير إطباع البشر مع ميوله
وشفت الذي للحقد والبغض نقال
دايم ما بين الناس يشعب ذلوله
ويستقبلونه بين دله وفنجال
ناس إليا منه هرج صفقوا له
ما بين وش سوى الفلاني ووش قال
هرج بليالب عرضه وطوله
يركض مع العالم ومشغلهم إشغال
الله عن وجه البسيطة يزوله
وشفت الحقايق نوب ماهيب تنقال
من بعض ناسٍ للمقفي ختوله
شذابة المقفي إمخيبة الآمال
ناس إلهرج السوء دايم ميوله
سوٍ على الغافل بالأقفا والإقبال
لهم مع الفرات صوله وجوله
وإلا الرجال بساعة الموقف رجال
كسابة الناموس مع كل جوله
"مدارات شعبية"