أثر العنا ذرف الدموع المحاجير
عند اللقاء بمطوّلين الغيابي
ما جت خيارٍ خطوتي جات تسيير
فزّ الخفوق المهتوي بالركابي
جاته مشاريف الحنايا محادير
والقلب سنّد يمهم وانتحابي
صفّيت له جيش المعاني طوابير
وتطوعنّ أحروفهن والحرابي
كنت أكتب إله الحرف واحسب وش يصير
ويوم انه أقبل ضعت أنا مع كتابي
ثم سقت له مضمون حالي تباشير
وأزريت أبيّن لوعتي واغترابي
ودي سحابه ينتشي لي مزابير
وتسيل منه الأودية والشعابي
ودي يسطّر غربتي عنه تسطير
وإن الفرح مع غيبتي عنه غابي
ولا قال غير (الكل يذكرك بالخير)
لا راح طاري معترض بك وجابي
يجتاح حرفه في طريقي عواثير
ويتوه وسط المظلمات الغبابي
(ما كل ما يبغى الفتى له يبى يصير)
حكمه وعوها محكمين اللبابي
سلّمت أنا أمري للرجاء والمقادير
وأدخل على الله من عظيم المصابي
"مدارات شعبية"