تعبت.. من حُبٍ بقلبي يعاندني
فيه النقيضين فيه المر والحالي
حبٍ لقاني شتات إحساس وأوجدني
يقول: أنا أول غلا؟ وأقول: والتالي
وشلون يسأل وشعري فيه جسّدني
ليته تغنّى بشعري قبل يعنالي!
أجيه كلي.. ومعه اصير فاقدني
وألقاني أسير عنده ما يورّى لي
حتى قصيدي يقول لديرته قدني
لأجل اتنشّد مع الغالي عن أحوالي
ولا صرت عنده تناساني وخلّدني
حتى تشوف القصيد وبدع الأمثالي
يا شِعر.. خلّك بحالك لا تمجّدني
من فيه غيري يوصّف عذب الأقوالي
ليله يبي ستر بدره لا يعايدني
ويشتّت الليل بدرٍ يشعل اشعالي
وردٍ تبسّم.. فقرّبني وبعّدني
أقرب من الفكر.. وأبعد لي من آمالي
لا جيت أبَوصف غلاه.. الوصف عقّدني
مدري هو أكبر هَلي والاّ أصغر عيالي؟!
قصايدي لو ما هي ضده تساندني
مدري وش اللي من محمد بيبقى لي؟!
"مدارات شعبية"